اللي يسألونه قبلك.
هذي الأسئلة اللي تجينا كل يوم في الواتساب وإنستقرام وتيك توك، جمعناها مع أجوبتها. دوّر على سؤالك قبل ما تكتب لنا، وغالباً بتلقاه. وإذا ما لقيته، زر الواتساب في آخر الصفحة.
قبل ما تبدأ
وش هو، ومن وين أبدأ، وما عندي حساب إعلانات
وش هو مُضاعِف، وإيش بستفيد منه؟
تربط حساب إعلانات قوقل حقك، ومُضاعِف يقرا أرقامه كل يوم ويطلع لك وين راح صرفك: إعلان أو عبارة بحث تصرف عليها وما تجيب لك أحد. بعدها يجهّز لك قرار مع سببه، تعتمده أنت وينفّذه في حسابك. وتكلمه بالعربي العادي، تسأله «ليش نزلت المكالمات؟» ويجاوبك من أرقامك.
يشتغل على إعلانات قوقل بأنواعها، ومعها إعلانات خرائط قوقل. أما سناب وتيك توك وميتا فخارجه حالياً.
ما أفهم في الإعلانات، ينفع لي؟
إيه، وعليه انبنى. ما تحتاج تعرف مصطلحات قوقل: تسأله بكلامك ويرد بالعربي، وكل قرار يجي معه سببه. وإذا ما اقتنعت لا تعتمده ولا يتغيّر شي.
الشي الوحيد اللي لازم تعرفه كم تقدر تصرف باليوم.
ما عندي حساب إعلانات قوقل، وش أسوي؟
هذا أكثر طلب يوصلنا، فلا تحس إنك متأخر. وأنت تسجّل اختر «ما عندي حساب إعلانات»، ومُضاعِف يجهّز لك حساب باسمك ويرسل دعوته على إيميلك المسجّل. تفتح الدعوة وتقبلها وترجع.
إذا الخيار ما فتح لك الحساب أو علقت في خطوة، اكتب لنا واتساب ونكمله معك.
ما عندي موقع ولا متجر، تسوون لي واحد؟
بناء الموقع أو المتجر خدمة منفصلة عن اشتراك المنصة، وما هو داخل أي باقة. أيمن يتفق معك على شغلها وسعرها بعد ما يعرف نشاطك، وتكلمه واتساب.
وإذا نشاطك كله على واتساب أو إنستقرام، لا تستعجل تبني موقع. إعلان قوقل يحتاج وجهة يودي لها الزائر، والوجهة ممكن تكون رقم جوال يتصل عليه أو موقعك في خرائط قوقل.
الدعوة ما وصلتني على الإيميل
أول شي شيك على الإيميل اللي سجلت فيه في مُضاعِف، وافتح مجلد الرسائل غير المرغوبة والعروض، لأن دعوة قوقل تروح هناك كثير. لازم يكون نفس الإيميل بالحرف.
وأحياناً يتأخر فتح الحساب نفسه. إذا مرّت ساعات وما وصلك شي، اكتب لنا واتساب ونعيد إرسالها.
أي إيميل أسجّل فيه؟
الإيميل اللي تبي دعوة قوقل توصله. أي إيميل يمشي، حتى هوتميل ما يلزم يكون جيميل. المهم تسجّل بنفس الإيميل في مُضاعِف وفي قوقل عشان الدعوة تلقاك، وتختار إيميل تقدر تدخله دايماً.
قبلت الدعوة، وبعدها وش؟
ارجع لمُضاعِف وكمّل من حيث وقفت. أول شي تشوفه قراءة حسابك وخطتك وأول قرار. لو حسابك جديد وما فيه حملة، المنصة تبني أول حملة وأنت تراجعها وتعتمدها.
بعد الاعتماد قوقل نفسه يراجع الإعلان الجديد قبل ما يعرضه، فلا تستغرب لو ما ظهر في نفس اللحظة.
فيه تطبيق؟
ما فيه تطبيق في متجر آبل ولا قوقل. المنصة موقع يشتغل من الجوال، وتقدر تثبّته على شاشتك ويفتح كأنه تطبيق: من سفاري زر المشاركة ثم «إضافة إلى الشاشة الرئيسية»، ومن كروم القائمة ثم «تثبيت التطبيق».
السعر والتجربة
كم، ومتى أدفع، وهل أقدر ألغي
كم الاشتراك؟
ثلاث باقات شهرية: البداية 500 ريال، النمو 1,200 ريال، الاحتراف 2,500 ريال. الفرق بينها في الحدود اليومية، يعني عدد المحادثات والمزامنات والتنفيذات المعتمدة. البداية لنشاط بحساب واحد، والنمو لنشاط يصرف كل يوم ويبي متابعة أقرب.
وش يصير في تجربة الـ14 يوم، ومتى تنحسب؟
الفحص الأول مجاني وبدون بطاقة: تربط حسابك وتشوف الفحص وخطتك وأول قرار. التجربة نفسها تبدأ لما تضغط «ابدأ التجربة»، وتحتاج وسيلة دفع صالحة لكن ما ينخصم منها شي خلال 14 يوم.
لو ألغيت قبل اليوم الخامس عشر ما تدفع ولا ريال. وإذا ما ألغيت، يبدأ اشتراك الباقة اللي اخترتها.
أقدر ألغي؟ وفيه التزام؟
ما فيه التزام. تلغي من صفحة الفوترة داخل المنصة بضغطة «إلغاء الاشتراك» وتأكدها. الإلغاء يوقف التجديد القادم ويبقى اشتراكك شغّال لين تنتهي المدة اللي دفعتها.
وصراحة، الشهر اللي انخصم ما يرجع لك لو تراجعت بعده. لهذا الأفضل تقرر داخل التجربة، مو بعدها.
وش يعني محادثات ومزامنات وتنفيذات في الباقة؟
المحادثة هي رسالة تسألها لمُضاعِف. المزامنة تحديث يدوي لأرقام حسابك من قوقل. والتنفيذ تعديل تعتمده وينزل في حسابك. الحدود يومية: البداية 20 محادثة و5 مزامنات و3 تنفيذات، النمو 100 و20 و20، والاحتراف 500 و100 و100.
وفترة التجربة تشتغل بحدود البداية مهما كانت الباقة اللي اخترتها، وحدودها الكاملة تبدأ مع أول دفعة.
الاشتراك يغطي صرف الإعلانات؟
لا. الاشتراك مقابل المنصة برقم ثابت في الشهر، وصرف الإعلان نفسه يروح لقوقل مباشرة من طريقة الدفع في حسابك. وأنت اللي تحدد الرقم اليومي.
كم أصرف باليوم؟
توصيتنا العامة للنشاط المحلي من 100 إلى 150 ريال باليوم. ميزانية مثل 3 ريال تمنع الظهور أصلاً.
وإذا صرفك قليل، الاشتراك ممكن ما يغطي نفسه. الأفضل تجرب بأقل رقم تقدر عليه، وتحكم من أرقام حسابك بعد ما تتجمع، مو من أول يومين.
هل يناسبني؟
الدول، والأنشطة، والمنصات
هل يدعم دولتي؟
المنصة ما تحدد دولة، تسجّل من أي مكان. بريطانيا والعراق ومصر كلها واردة. الشرط حساب إعلانات قوقل شغّال وطريقة دفع يقبلها قوقل في بلدك.
وإذا بلدك عليها قيود من قوقل نفسه، فهذا قيد من عندهم وما نقدر نتجاوزه.
هل يناسب نشاطي؟ مطعم، متجر، عيادة، خدمات
يقرا حسابك أنت مو قالب جاهز، فيشتغل مع المتاجر والمطاعم والعيادات والشركات الخدمية. ونقول لك من البداية لو نشاطك ما يتحمل قوقل.
قوقل يجيب لك اللي يبحث الحين عن شي تبيعه، لكنه ما يعرّف الناس بعلامة ما سمعوا عنها. إذا مشكلتك إن أحد ما يعرف اسمك، قوقل غالباً مو أول خطوة لك.
أعلن على إنستقرام وتيك توك وسناب، تغطونهم؟
لا، حالياً قوقل فقط ومعه خرائطه. سناب وتيك توك وميتا ما نخدمها الحين، ولا نعدك بموعد لها.
وإذا بيعك على إنستقرام بس، إعلان قوقل يحتاج وجهة يودي لها الزائر: موقع، أو رقم جوال يتصل عليه، أو موقعك في خرائط قوقل.
وين يظهر الإعلان؟ وأقدر أحدد المدينة؟
يظهر لمن يبحث في قوقل وفي خرائط قوقل، ولا يلزم يكون من متابعينك. وتحدد المنطقة اللي تبي الإعلان يوصلها وقت إعداد الحملة.
وش اللي ما تسويه المنصة؟
ما تبني موقعاً ولا متجراً، وما تصمم فيديوهات وصور إعلانية، وما تدير سناب وتيك توك وميتا. هذي إما خدمات منفصلة عند أيمن وفريقه أو خارج المنصة أصلاً.
وإذا موقعك فيه خلل في الربط أو التتبع، المنصة تنبّهك له لكنها ما تصلحه داخل موقعك، وتحتاج مختص يمسك موقعك. وصرف الإعلان يروح لقوقل مو لنا.
عندي حملة شغالة أصلاً، وش أستفيد؟
يقرا الحملة الحالية بدل ما يبدأ من الصفر: وين يروح الصرف، وأي عبارات تصرف بدون نتيجة، وأي إعلان يستاهل تكمل عليه. وأي تعديل ما ينزل إلا باعتمادك، وترجع عنه خلال 30 يوم.
ما أبغى أتعامل مع منصة، أبغى أحد يدير لي إعلاناتي
هذا شغل وكالة مُضاعفة، ونفس صاحب المنصة أيمن أمين وفريق يتولى التجهيز والمتابعة. المنصة تناسبك لو عندك وقت تقرا القرارات وتعتمدها، والوكالة تناسبك لو ميزانيتك كبيرة أو ما عندك وقت.
كلمنا واتساب وأعطيك العرض بعد ما نعرف نشاطك وميزانيتك.
الأمان والتحكم
الصلاحيات، والتعديل بدون علمي، والتراجع
وش الصلاحية اللي تاخذونها على حسابي؟
صلاحية إعلانات قوقل بس، من شاشة موافقة قوقل الرسمية. ما نطلب كلمة مرورك، ورمز الوصول محفوظ مشفّر. وتسحب الصلاحية متى ما بغيت من إعدادات حساب قوقل، أو بحذف حسابك عندنا.
كيف أتأكد إنه ما يغيّر شي في حسابي بدون علمي؟
ما يوصل حسابك أي تعديل بدون ما تضغط اعتمد، حتى لو سألته بالصوت. وهذا مكتوب في الكود مو بس وعد: الميزانية ما ترتفع أكثر من 20% في الخطوة الواحدة ولا أكثر من 50% خلال 24 ساعة، وهدف المزايدة ما يتحرك أكثر من 20% في المرة.
اعتمدت قرار، هل خلاص انتفذ؟ أروح قوقل أدز؟
لا تروح. لما تضغط اعتمد، مُضاعِف يتحقق من التعديل وينزّله في حسابك بنفسه.
وبعض القرارات تجي بدون زر اعتمد لأنها تعديل لازم تسويه أنت بنفسك. والقرارات اللي بعد الأول تنفتح لك مع التجربة.
اعتمدت تعديل وما عجبني، أرجّعه؟
أي تعديل نفّذه مُضاعِف يبقى له زر «رجّعه» لمدة 30 يوم. تلقاه في الصفحة الرئيسية تحت «التغييرات الأخيرة»، وضغطة وحدة ترجع القيمة السابقة.
القرارات من بشر أو من ذكاء اصطناعي؟
القرارات يجهّزها نظام ذكاء اصطناعي يقرا أرقام حسابك، والاعتماد بيدك أنت. لو تبي مسوّق بشري يمسك حسابك ويتابعه، فهذا شغل وكالة مُضاعفة مو المنصة.
صار لي شي
رابط ما فتح، إعلان ما يظهر، صرف بدون عملاء
الرابط ما فتح، أو ما قدرت أسجّل دخول
لو فتحته من داخل تيك توك أو إنستقرام أو سناب، المتصفح الداخلي ما فيه حساب قوقل حقك، وروابط الدخول بالإيميل تفشل لو طلبتها من متصفح وفتحتها من ثاني. افتح ai.modaafa.com من سفاري أو كروم مباشرة، وفي صفحة التسجيل يطلع لك زر «افتح في المتصفح».
وإذا طلبت رابط دخول بالإيميل، افتحه من نفس المتصفح اللي طلبته منه.
ولو قوقل يطلب منك مفتاح مرور أو باركود وما تقدر تكمل، هذا من حساب قوقل نفسه مو من المنصة. جرّب إيميل ثاني، أو سجّل دخول بالإيميل بدل قوقل.
إعلاني ما يظهر، أو واقف
أبسط سبب شفناه: ما انضافت طريقة دفع في حساب قوقل. بعدها الميزانية اليومية، لأن رقم صغير جداً يمنع الظهور. وأحياناً الإعلان ببساطة لسا تحت مراجعة قوقل.
وفيه سبب رابع نشوفه: لو قوقل حكم إن موقعك مخترق أو فيه شي مشبوه، توقف إعلانه ويطلع لك في حسابك إن المجموعة الإعلانية غير مؤهلة. هذا يحتاج تنظيف الموقع أولاً.
لو راجعت هذي الأسباب وما تغيّر شي، صوّر لنا صفحة الحملة وارسلها واتساب.
صفحة الربط تقول ما فيه حساب إعلانات، أو ترجعني لنفس الصفحة
هذي الرسالة تطلع لما الإيميل اللي اخترته في شاشة قوقل ما تحته حساب إعلانات. ارجع واختر الإيميل اللي فيه الحساب، أو اختر «ما عندي حساب» ونجهز لك واحد.
وإذا انفتح لك حساب ولسا تطلع نفس الرسالة، افتح دعوة قوقل في إيميلك وتأكد إنك قبلتها بنفس الإيميل اللي سجلت فيه. لو ما انحلت اكتب لنا واتساب.
قوقل علّق حسابي أو ما يقبل بطاقتي
تعليق الحساب وتوثيق هوية المعلن وقبول البطاقة والرمز البريدي كلها تصير داخل قوقل أدز نفسه، وقوقل هو اللي يقرر فيها. مُضاعِف ما يقدر يدخل حسابك ويفك عنك التعليق.
اللي تسويه: ارفع الأوراق اللي يطلبها قوقل وانتظر مراجعته. وإذا الرفض بسبب البطاقة، جرّب بطاقة ثانية أو راجع بنكك.
ربطت حسابي وطلعت لي شاشات فاضية: لا توجد حملات
يعني الحساب مربوط لكن ما فيه حملات تنقرأ، أو قوقل ما يسجل التحويلات. الحساب الجديد طبيعي يطلع فاضي، والفحص الأول يطلع قصير لأن ما فيه بيانات.
لو عندك حملات وما ظهرت، حدّث بيانات الحساب. وإذا استمر الوضع اكتب لنا واتساب، لأنه غالباً شي في الربط.
حسابي ما يصرف تقريباً، وش تقدر تسوي لي المنصة؟
الحساب اللي ما يصرف ما فيه أرقام يقراها مُضاعِف، فالفحص الأول يطلع قصير. إذا حسابك يصرف قليل جداً أو جديد، عندك طريقين: تطلق أول حملة بنفسك، أو يطلقها لك فريق مُضاعفة بمبلغ 750 ريال مرة وحدة.
إعلاني يشتغل كم يوم وبعدها يصرف بدون عملاء
نتيجة الأيام الأولى غالباً ما تمثل الحساب، لأن قوقل لسا يتعلم. أما لو يصرف أسابيع بدون اتصال ولا واتساب، فأول شي نفحصه هل التحويلات تنسجّل صح. إذا قوقل ما يشوف الاتصال أو الرسالة، يصرف وهو أعمى.
ولهذا مُضاعِف ما يقترح رفع ميزانية حملة إلا لما يكون التتبع سليم.
كيف أثق؟
النتائج، والضمان، ومن وراء المنصة
كيف أثق فيكم؟ وفين نتائج العملاء؟
ما نعرض هنا أرقام عملاء ما نقدر نثبتها، ومن يعرض لك نسب خيالية في الإعلانات لازم تشك فيه. اللي نقدر نوريك فعلاً: الفحص الأول مجاني وبدون بطاقة، يعني تشوف شغلنا على حسابك أنت قبل أي دفع.
المنصة تابعة لمؤسسة تقنيات أيمن للتسويق الإلكتروني (الرقم الوطني الموحد 7038156571)، وأيمن أمين مؤسس وكالة مُضاعفة، شريك قوقل. وكل تعديل بإذنك وتتراجع عنه خلال 30 يوم.
جربت إعلانات قوقل قبل وخسرت فلوس، ليش الحين يختلف؟
ما نقدر نقول لك إنها بتنجح هالمرة، ومن يقول لك كذا يبيعك كلام. اللي نعرفه إن الصرف الطويل بدون زبائن غالباً سببه أحد شيئين: التتبع ما يسجل الاتصال والرسائل، أو عبارات بحث تصرف بدون نتيجة.
مُضاعِف يفحص هذي بالذات على حسابك أنت، وفحصه الأول مجاني وبدون بطاقة، فتشوف وين راح صرفك قبل ما تدفع شي.
تضمنون لي نتيجة؟
لا. ما نضمن مبيعات ولا رقم معين، ومن يضمنها لك في إعلانات قوقل يبيعك كلام. اللي نلتزم فيه إن لكل قرار سبب من أرقام حسابك، وإن الاعتماد بيدك، وإن الرجوع متاح.